الخميس 28/نوفمبر/2024 – 11:49 م
علق عدلي القيعي رئيس شركة الكرة السابق بالنادي الأهلي، على عقوبة إمام عاشور لاعب الفريق بسبب ما بدر منه.
تصريحات عدلي القيعي
وقال القيعي في تصريحات تليفزيونية: كلٌ على قدره، غلطة الشاطر بألف لما تبقى نجم كبير والناس شيلاك على الراس ما تغلطش أخطاء المبتدئين، وهنا لا أتحدث عن انفعال لحظي أو تصرف فردي لأنه لما بيتكرر من النجوم بالذات يبقى لازم نتوقف ونقول هو في إيه؟
وأضاف القيعي: عندما تصل الإشادة وتتجاوز دورها الموضوعي لمجرد إني برد على المنافس أو بنخلق أساطير ردا على خلق أساطير أنا ماليش دعوة بغيري، أنا اللاعيب عندي يقيم بأداؤه والتزامه وسلوكه وجماعيته مش لأنه أمهر واحد عندي، أمهر واحد هيحاسب على قدر المتوقع منه.
وأكمل القيعي: هو اللاعيب زعلان أنه مابيلعبش لأنه مش مستوعب المشهد، هو بيقولك إزاي أبقى كويس واتركن، إذا كان المدرب هيمسك النجوم يستنزفها في المباريات التي تحتمل الروتيشن عشان يستفيد منها في الماتشات الأكبر يبقى أنا كنجم مش مستوعب ده، ولو خدتها في المعني الحرفي في ترتيب المسؤوليات والحقوق مش من حقك تزعل، اللاعيبة دي متأثرة بالمناخ العام وبيتلعب في ودانها كتير جدا.
وواصل القيعي: بقول للجمهور على قد ما بتشجع ما تروحش تاخد النجم تعلي فيه لحد ما يحس أنه غير قابل للمس إحنا بشر، أنا بتكلم بشكل عام لأي واحد بيغلط والمسؤول لازم يدور ده سببه إيه، وبلاش يا جمهورنا المقارنة بين اللاعبين.
وأردف القيعي: الردع مطلوب وتطبيق اللوائح مهم جدا وفرض النظام أهم وما فيش أهم من النادي، لكن الأجمل من كل ده إنك ما تضطرش تطبق العقوبات، بأنه يكون في استيعاب.. أرجوكم خلوا بالكم لما اتقال في 2008 يا نوقف النادي يا نوقع الأهلي الموضوع ده ماشي باحترافية، فيه ناس بتفكر وناس بتنفذ بدقة، نتمنى أن ندرك المشهد الإعلامي صح.
واستطرد القيعي: يا كابتن إمام مؤكد إنك لاعيب عندك إمكانيات كبيره بس أنت مش أحسن حاجة في الدنيا لسه، تقدر تكون أحسن حاجة آه، أنت ماكنتش وأنت في الزمالك أحسن لاعيب في مصر بس كنت لاعيب واعد جدا، وأنت عندي لاعيب مهم زي زمايلك الكبار اللي حواليك، لما واحد يلعب ويتم الإشادة بيه أنت ما تزعلش لما يجي دورك دوس علشان ترجع وتلعب وتريح زميلك ونستفيد منك ومنه، أنا عارف أنك إنسان معدنه كويس، طلع اللي بيلعب في ودنك ده ودوس عليه لأنه حشرة هتخرملك طبلة ودنك لأنه مش عايز مصلحتك، ده عايز يخلص عليك ويهز استقرار الفريق.
واختتم القيعي تصريحاته قائلا: حبوا الأهلي كما وجدتموه.. وجدناه منظم وما فيش حد أهم من الكيان، العمل الجماعي أهم من الفردي وكل اللاعيبة اللي بيجيبها الأهلي نجوم.
