استدرجاه وقطعاه لأشلاء.. اعترافات المتهمين بإنهاء حياة الممرض مينا موسى

الأحد 22/ديسمبر/2024 – 11:58 ص

تستكمل محكمة جنايات القاهرة شمال القاهرة المنعقدة بالعباسية، بعد قليل، نظر محاكمة المتهمين بإنهاء حياة ممرض المنيا مينا موسى، وتقطيع جسده لأشلاء بمنطقة الزاوية الحمراء.

اعترافات المتهمين بإنهاء حياة الممرض مينا موسى 

وحصل القاهرة 24 على نص التحقيقات في قضية مقتل مينا موسى ممرض المنيا، عقب استدراجه من محافظة المنيا مسقط رأسه إلى محافظة القاهرة وتحديدًا بمنطقة الزاوية الحمراء، من أحد الأشخاص بحجة وجود فرصة عمل. 

وفور وصوله، احتجزه المتهم بمعاونة آخر لمساومة أسرته على مبلغ مالي، وحال مقاومته للأول تعدى عليه حتى الموت وقطع جثته وألقى بها في ترعة الإسماعيلية.

واستمعت جهات التحقيق لأقوال المتهم الأول إبراهيم. ر، وجاءت كالآتي:

اسمي إبراهيم دبلوم صنایع وبشتغل عامل في المنيا، لحد ما اتفتح قدامي مجال إني أكون جليس لكبار السن في القاهرة.

س: ما هي تفصيلات إقرارك بارتكاب الواقعة تحديدًا؟

ج: أنا من الضيقة اللي أنا فيها بدأت أفكر ازاي أجيب فلوس، لحد ما جه في دماغي إننا نستدرج حد نجيبه على البيت اللي أنا شغال فيه نسرقه، وجه في بالي واحد كان كلمني من فترة كبيرة سألني على شغل مع حد مسن وأنا سجلت رقمه من ساعتها. 

وأضاف قاتل مينا موسى في التحقيقات: كلمت مينا موسى وقولتله إني محتاج حد جليس مع راجل كبير وقالي إنه جاهز، واتفقت معاه إنه يجي ولما يوصل مصطفى هيكون في البيت مستخبي ورا الباب ومعاه ماسورة حديد، وأول ما ندخل أنا ومينا وأقفل الباب هو يهدد مينا علشان ميعملش صوت ونسرقه ونمضيه على وصل أمانة أو نطلب فدية.

وأكمل: يوم الواقعة الصبح قالي إنه جاي في السكة ولما وصل عند المصنع اتصل بيا ووصفتله البيت، وأنا كنت مستنيه، ولما ودخلنا أنا ومينا راح مصطفى طالع من ورا الباب وكان معاه الماسورة الحديد، قعد يضرب في مينا بالحديدة، ويهدده يقوله اقعد لموتك لحد ما سيطر عليه، ومصطفى بدأ يقلب في جيوبه طلع تليفونه والمحفظة وفتحها كان فيها 500 جنيه خدهم، واتفقنا إننا نشوف حد من أهله نطلب فدية.

وواصل في اعترافاته: لما مصطفى نزل أنا سجلت تسجيل بصوت مينا بيقول فيه يا جماعة أنا كويس بس ابعتولي أي فلوس أبعتها للست اللي كنت رايح اشتغل عندها علشان مش عايزه تسيبني، وخدت منه رقم ابن عمه وبعتهاله علشان يبعت فلوس بس ساعتها بدأ مينا يعلي صوته روحت ماسك الحديدة وبدأت اضرب فيه وقولتله لو مسكتش هموتك.

وأضاف قاتل مينا موسى في التحقيقات: فضل برضوا يقول الحقوني وأنا ساعتها خوفت حد يسمع وبدأت أضربه جامد بالحديدة على دماغه علشان أسكته لحد ما لقيته جاب دم وفصل خالص واكتشفت إنه مات.

وأكمل المتهم في التحقيقات: بدأت أفكر أعمل إيه في الجثة سحبته خبيته في الحمام وبدأت أشوف أي حاجة أقطعه بيها، لقيت صفيحة منشار في البيت، خدتها ودخلت الحمام وبدأت أقطع فيه، وبعد كده كان في شوال أبيض بلاستيك في الشقة، خدته وحطيت فيهم الأشلاء ونزلت روحت على ترعة الإسماعلية فضيت الشوال في الترعة.