الست النهاردة بقت أكتر قوة واستقلالية ولازم نعترف بمكانتها

الأربعاء 04/ديسمبر/2024 – 09:57 م

ألقت الإعلامية هاجر حليم الضوء على التحولات الجذرية التي شهدها دور المرأة في المجتمع، مؤكدة أنها تجاوزت مجرد كونها نصف المجتمع لتصبح روحه ومحركه الأساسي، وذلك في حلقة مميزة من برنامجها الجميلة والوحشين على قناة هي.

وقالت هاجر حليم في سياق حديثها: الست بقت بتشتغل، وبتربي ولادها، وبتدير بيتها بكل حب ومسئولية، ومع كل ده، قدرت تثبت وجودها في كل مجال ممكن تتخيله، من الوزيرة للدكتورة وحتى العاملة في المصانع.

هاجر حليم تطالب بالاعتراف الحقيقي بمكانة المرأة

كما دعت هاجر حليم إلى ضرورة مراجعة النظرة التقليدية لدور المرأة، قائلة: زمان كانوا بيقولوا الست نص المجتمع، لكن الحقيقة أكبر من كده بكتير، هي اللي بتحرك المجتمع كله، وشايلة مسئوليات كبيرة جدًا، طيب ليه القوانين أو المفاهيم اللي بتحكم حياتها لسه مش معبرة عن ده.. لازم نعترف بمكانة المرأة، الست أكتر من نص المجتمع. 

وأضافت هاجر حليم حديثها برسالة تدعو فيها إلى الاعتراف الكامل بدور المرأة، ليس فقط بالكلمات، بل من خلال منحها حقوقًا ومسئوليات تعكس واقعها الحالي، قائلة: الحلقة فتحت المجال لنقاش أعمق حول مكانة المرأة في المجتمع الحديث ودورها المحوري في صنع المستقبل، وإحنا عايزين مجتمع عادل ومتوازن، مجتمع بيعترف إن الست نص الحياة وروحها، والعصمة في إيد الست مش مجرد مطلب، دي خطوة مهمة عشان نعترف بقيمتها ودورها الحقيقي.

وختمت حديثها: الست النهاردة بقت أكتر قوة واستقلالية، بقت شريكة حقيقية في كل نواحي الحياة، من الشغل والتعليم، لتربية الأولاد وإدارة البيت، الست مش محتاجة حد ياخد قرارات نيابة عنها، لأنها قادرة تقرر وتتحمل تبعات قراراتها، الست مش مجرد نص المجتمع، الست أكتر من كده بكتير، هي اللي بتدي للحياة روحها ومعناها، ولو عايزين نعيش في مجتمع بيؤمن بالمساواة، لازم ندي الست حقوقها الكاملة، ومن ضمنها حقها في العصمة.
 

برنامج الجميلة والوحشين

برنامج الجميلة والوحشين تقديم الإعلامية هاجر حليم، ويعرض عبر شاشة قناة هي كل أربعاء الساعة السابعة مساء، وهو برنامج نسائي يناقش قضايا المرأة من أجل الدفاع عنها وحقوقها في المجتمع العربي.