العصمة دلوقتي من حق الست زي الراجل

الأربعاء 04/ديسمبر/2024 – 09:21 م

طرحت الإعلامية هاجر حليم قضية جدلية أثارت نقاشا واسعا بين الجمهور، وهي: ليه العصمة متكنش في إيد الست، وذلك في حلقة جديدة من برنامجها الجميلة والوحشين على قناة هي.

هاجر حليم: العصمة من حق الست زي الراجل

بدأت الإعلامية هاجر حليم حديثها بتسليط الضوء على التحولات الكبيرة التي شهدها دور المرأة في المجتمع، وقالت: في الأيام اللي إحنا فيها دي، الست بتشتغل، وبتصرف، وبتربي ولادها، وبتدير بيتها بكل حب ومسئولية، لو فكرنا بواقعية، هنلاقي إنها مش بس مش أقل من الراجل، دي في حاجات كتير بتتفوق عليه، فالعصمة دلوقتي من حق الست زي الراجل.

وأشارت  الإعلامية هاجر حليم، إلى أن فكرة العصمة كانت في الماضي موضوعا مستبعدا وغير قابل للنقاش، لكن مع التطور الكبير في مكانة المرأة في المجتمع، بقت المطالبة بها حاجة تستحق التفكير.

وأضافت: ليه العصمة تكون بس في إيد الراجل؟ هل الست أقل حكمة أو وعي؟ هل هي مش قادرة تاخد قرارات مصيرية تخص حياتها وحياة أسرتها؟ الحقيقة، الست أثبتت إنها أذكى بكتير من إنها تتصور كطرف تابع.

وأوضحت هاجر حليم، أن المسألة مش مجرد تغيير في الأدوار، لكنها خطوة نحو تحقيق المساواة في المسئولية داخل العلاقة الزوجية.

 وقالت هاجر حليم: العصمة مش كلمة، دي مسئولية، وزي ما الراجل بيشيلها، ليه الست متتحملهاش كمان؟ وجود العصمة في إيدها ممكن يحميها وأسرتها من قرارات متسرعة أو ظالمة.

لكن هاجر حليم لم تنف المخاوف الذي يطرحها البعض عن إمكانية إساءة استخدام العصمة من قبل المرأة، وقالت: فيه ناس هتقول: الست لو خدت العصمة هتسيء استخدامها.. لكن ده تصور بعيد عن الحقيقة.. الست بطبيعتها حنونة وبتحافظ على بيتها.. مش هتاخد أي قرار إلا لما تكون متأكدة إنه في مصلحة أسرتها وأولادها.

كما استضافت هاجر في حلقتها ببرنامج الجميلة والوحشين، الشيخ سعيد الشافعي، المأذون الشرعي، وبدوره أكد: العصمة تجوز تكون مع الست ودا بيكون شرط في عقد الزواج بين الطرفين.

برنامج الجميلة والوحشين

برنامج الجميلة والوحشين تقدم الإعلامية هاجر حليم، ويعرض عبر شاشة قناة هي كل أربعاء الساعة السابعة مساء، وهو برنامج نسائي يناقش قضايا المرأة من أجل الدفاع عنها وحقوقها في المجتمع العربي.