راضيين بقضاء الله بس عاوزين جثمان ولدنا نكرمة..أسرة محمود إبن الأقصر ضحية غرق مركب سفاجا

الأحد 01/ديسمبر/2024 – 08:01 ص

تمتلىء عيون أم الشيف محمود محمد على محمد ذو ال 40 عاما، إبن النجع الطويل بالكرنكً شمال مدينة الأقصر، ضحية حادث غرق مرسى علم بالدموع، وبكلمات تخنقها العبرات تردد: عاوزة جثمان إبنى حتى أطمن علية في قبر يضمة.

عاوزين ندفن ولدنا وندفيه بقبر يضمة

وقالت أم محمود للقاهرة 24: اول ما وصلنى الخبر وقعت من طولى لدرجة كنت بطبخ النار ولعت في الاكل وانا بصرخ هاتولي ولدي، حي ميت عاوزة ولدي، اتدفى بيه جنبي.

وأضافت أم محمود: لينا 7 أيام مش عارفين ولدنا حي ولا ميت، واحنا راضيين بقضاء الله وقدرة، حتى لو ميت عاوزة اطمن علية في قبر يدفية ومكان نعرف نزورة فيه حتى على الاقل، وياريت اي حد سامعنى يحس بحرقة قلبي ويساعدنا في البحث عن محمود.

وقالت زوجة محمود للقاهرة 24: زوجى محمود كان مؤدب وخجول والبلد كلها بتحبة، ومكنش حارمنى انا وعيالة ال3 بنتين وولد لسه عمرة 4 سنين من حاجة، وكل شوية يسألوني بابا فين، ما كلمناش بالتليفون ليه، ومجاش ليه.

و أوضحت زوجة محمود: كل اللي عاوزينة جثمان محمود، نطمن علية،حتى في قبر يضمة، واخد العيال نقعد جنبة واطمنهم ابوهم هنا ونزورة وندعيلة.

مش عارفين نطلع حتى شهادة وفاة ونخلص مستحقاته

وقال الحاج  محمد على محمد والد الشيف محمود للقاهرة 24: إبنى من شطارتة في مهنتة سموة الشيف محمود الشربيني، وهو بيشتغل في السياحة من 4 سنين، وآخر ظهور له بحسب كلام زملائة معاه في الشغل كان على سطح المركب حيث اختار النوم بهً قائلا حاسس إننا هنغرق.

وأضاف والد محمود: ولدنا فقد منذ 7 أيام في حادث غرق مركب مرسى علم وطول الوقت ده منتظرين جثمان ولدنا يطلع،ولما يأسنا عملنا صلاة الغائب على روحة عقب صلاه الجمعة بمسجد الشيخ مبارك بنجع الطويل، وعملنا العزاء.

وأوضح والد محمود:  إحنا راضيين بقضاء الله وقدره، وكل اللي  بنتمناة العثور على جثمان محمود لدفنة،علشان نطمن قلوبنا ونكرمة، اكرام الميت دفنة وميبقاش قلبنا محروق طول الوقت على ضنانا لا عارفين هو حى، ولا ميت، حتى اوراقة ومستحقاتة مش عارفين نخلصها لأنه قدام الدولة لسه حي ومفيش شهادة وفاة، عاوزين جثمان ولدنا ندفنة في قبر، وكل اللي بنتمناه تكثيف البحث في البحر على جثمان ولدنا.