شكرا على متابعتكم خبر عن شقيق طالب حلوان يكشف لـ القاهرة 24 تفاصيل المشاجرة بالجامعة
السبت 28/ديسمبر/2024 – 01:59 ص
كشف شقيق الطالب ضياء، طالب كلية الحقوق بجامعة حلوان، عن تفاصيل جديدة حول المشاجرة التي وقعت بالجامعة بين شقيقه وزميله عمر، والتي أصيب فيها الاثنان، موضحًا، أنه لم يكن هناك سلاح أبيض (مطوه) في المشاجرة.
وقال شقيق ضياء طالب جامعة حلوان، إنه كان فيه مشكلة بين ضياء وعمر، من قبل الحادثة بحوالي ثلاثة أيام أو باسبوع حاجة زي كده، بسبب بنات، فيه بنات صحاب عمر فيهم واحدة قالت لعمر إن ضياء ده بيقعد يرخم علينا، وضياء أصلا مش بينزل الجامعة إلا كل فين، فمن هنا بدأت المناوشات بينهما، فجاء يوم الامتحان ضياء واقف وصحابه بيجيبوله أكل، فعمر راح معدي وراح خبطه في كتفه، فقال له انت بتخبطني ليه؟
راح بصله كده وضحك،أنا بكلمك أنت بتخبطني ليه؟
قاله أنا بصراحة قرفان منك عشان أنت شايف نفسك، وكلمة في كلمة مسكوا في بعضهم، راح عمر طلع مفتاح من جيبه وراح خبط ضياء في رقبته وخبطه ضربتين في بطنه وليس بمطوه.
تفاصيل حادثة جامعة حلوان
وتابع شقيق ضياء في حديثه لـ القاهرة 24: صحاب ضياء أخويا دخلوا في الموضوع وسلكوهم عن بعض وكلام ده، راح بعد كده عمر جرى يجيب قالب طوب من الأرض ولسه بيخبط بيه ضياء، راح ضياء زقه راح واقع على الأرض، ففيه سيخ من الأرض خبط عمر في بطنه، ومفيش ضرب بالمطوه ولا الكلا ده، وأخويا ضياء من الشطار جدا، وطالع بتقدير جيد جدا، ومش بينزل الجامعة إلا كل فين وفين.
وأضاف: بعد كده ضياء فضل واقف، واتجمع صحاب عمر، واتدخل الأمن، وضربوا عمر كانوا حوالي 10 على واحد، راح ضياء اتصل ساعتها بي أنا وقالي تعالي لي الجامعة بسرعة عشان حصل كذا كذا، وفيه واحد صاحبي اتخانق معايا في الجامعة بسبب كذا كذا، المهم قلت له أنا جاي لك بسرعة طب فيه حاجة؟
قال لي لا مفيش حاجة هو وقع على سيخ حديد واتعور بس فيه ناس كتير برا مستنين، خدت أنا ولاد عمي وروحنا بالعربيات على الجامعة، دخلنا على الأمن فين ضياء، قالوا القسم أخده، قسم حلوان، جرينا على قسم حلوان فين ضياء؟
قالوا ده جوه متعور.
وأردف: أخدت ولاد عمي وطلعت على المستشفى، قابلت خال عمر كان هناك، وقولت له ضياء أخويا وعمر ده أخويا، وعلى فكرة أنا أخويا محبوس في القسم، ومتعور برضو، أنا جيت لكم الأول، وعمر زيه زي ضياء، ومصلحة عمر تهمني قبل ضياء، قالي بعد أذنك ممكن تمشي دلوقتي علشان الدنيا مشدودة وممكن حد من ولاد عم عمر يتهجم عليك، قولت له أزي أنا جاي لحد عندكم، قالي طيب أمشي، قولت أنا عملت بالأصول وجيت لكم، بعد كده مشيت، واتصلنا بكذا حد من عندهم من البلد، علشان نطمن على عمر، لكن أهله رافضين أننا نروح، ورافضين الصلح والتواصل، وكان الأمن شاهد على كل حاجة، وقالوا لنا لولا ما دخلنا أخوك وقفلنا عليه كانوا هيموته.
بداية الحادثة
وكان قد تعرض طالب بجامعة حلوان فيما وصف بـ الطعن على يد زميله؛ بسبب خلافات سابقة بينهما.
وكشف مصدر مسؤول بجامعة حلوان عن تفاصيل إصابة طالب بالجامعة على يد زميله، مشيرا إلى أن ذلك حدث بسبب مشاجرة بين الطالبين، قائلا: الطلاب تنمروا على هذا الطالب، وحدثت المشاجرة.
وفي وقت سابق، كشف أحد أقارب طالب جامعة حلوان المطعون على يد زميله، عن تفاصيل الواقعة، قائلا: الولد اتريق على عمر “المجني عليه”، وحصلت مشادة بينهما فأخرج الطالب المتهم مطواة وطعن عمر بها.
