كولر يعلق على فوز الأهلي في مباراة شباب بلوزداد وهجوم الجماهير

الأحد 22/ديسمبر/2024 – 09:17 م

حرص المدير الفني السويسري للنادي الأهلي، مارسيل كولر، على الحديث بشان فوز فريقه على شباب بلوزداد في دوري أبطال إفريقيا، وهجوم الجماهير على اللاعبين. 

تصريحات مارسيل كولر

وقال مارسيل كولر في المؤتمر الصحفي عقب المباراة: مباراة صعبة اليوم السبب في ذلك أن الجماهير في البداية لم تكن مساندة للفريق، وأنا أعتبره خسارة وشيء غير مفرح، لأنه معروف في كرة القدم أنه ممكن ييجي يوم ومكنش موفق. 

وأضاف: ما حدث أثر على معنويات اللاعبين في بداية المباراة، وشباب بلوزداد تقدم علينا، ولم نقدم شوطا أول جيد، لكن أحرزنا التعادل قبل نهايته.

وتابع: بين الشوطين طالبت اللاعين أن يثقون في أنفسهم، وقدرنا نسجل 5 أهداف في الشوط التاني، والكلام جاب نتيجة إيجابية.

وواصل: متاح لينا ولكل الجماهير الفرحة بالفوز، بس لازم نبص لقدام وعندنا تحديات صعبة جاية

وتابع: هل الشناوي تأثر بهتاف الجماهير ضده؟، مقدرش أقول كدة وأحكم على الأسباب اللي أدت للهدف، أنا هشوف الماتش تاني وأعرف إزاي الخطأ ده حصل من البداية، وبعدها هتكلم عن اللي حصل.

وأضاف: أنا قلت للاعبين بين الشوطين إنه كان ناقصهم الثقة بالنفس، وقلتلهم لازم الناس تشوف إنكم لاعيبة كرة بجد، ومكنش عندي شك في الفنيات ولا قدراتهم، وهم نفذوا الكلام اللى قلنا عليه وبان على الأداء في الشوط التاني. 

وأردف: توتر العلاقة بين اللاعبين والجماهير، المطلوب يكون فيه تفهم وجهة نظر الجانبين، الجماهير عظيمة وكبيرة ومتفهمين غضبهم في بعض الأحيان، لكن كنا متوقعين أنهم يساعدوا الفريق أكتر في ماتش مهم زي ده أمام منافس قوي من الجزائر.

وأكمل: مفيش حد بيكون قاصد يلعب وحش، ولا لاعب قاصد يقصر واللاعبين بشر ممكن يكونوا مش في يومهم، وهذا شيء طبيعي لازم يكون فيه تفهم من الجماهير، ومفيش فريق في العالم بيكسب على طول أنا بقالي سنتين حققت نتائج جيدة، وقلت للاعبين بين الشوطين لازم نبين معدن البطل الحقيقي، ودا اللي بيظهر في الوقت الصعب وبالفعل ده اللى حصل والجماهير ساعدتنا في الشوط التاني.

واستطرد: إحنا محتاجين جماهيرنا في كل ماتش وفخورين بهم، لكن لازم يكون فيه احترام متبادل بين جميع الأطراف، لما تشتم لاعب قبل ماتش صعب هيكون صعب إن اللاعبين أو الجهاز يعدوها ويتعاملوا عادي، أنا متأكد إن اللى حصل هيكون دافعة قوية وبداية عهد جديد هنفرح بالفوز ونهديه للجماهير، وهنفتح صفحة جديدة وننسى اللي حصل سواء النهاردة أو المباراة الماضية.

واختتم تصريحاته قائلا: بعتبر خالد عبد الفتاح لاعب مهم جدا، وكرة القدم لعبة الأخطاء، ومفيش لاعب بيلعب ماتش كامل بدون أخطاء، ولو هعاقب كل لاعب يغلط بعد شوية مش هيكون معايا ولا لاعب، وإحنا بنتكلم مع اللاعبين وبنشرحلهم الموقف والتحليل والشرح أفضل من العقوبات، واللاعبين بيتقبلوا الكلام ويصلحوا أخطائهم.