معلم الفيزياء صاحب فيديو الألفاظ الخادشة: الطلبة كانوا غلطانين واستفزوني.. والناس تشهد بسمعتي

انتشرت حالة من الجدل عبر مواقع التواصل الاجتماعي خلال الساعات الماضية، عقب تداول مقطع فيديو ظهر به معلم يردد ألفاظًا غير لائقة داخل فصل دراسي بإحدى مدارس محافظة دمياط.

معلم الفيزياء صاحب فيديو الألفاظ الخادشة: الطلبة كانوا غلطانين واستفزوني

وقال المدرس محمد الباني، معلم الفيزياء صاحب فيديو الألفاظ الخادشة: حابب أوضح للناس إن الفيديو ده قديم بقاله سنة ومفيش أي حد اشتكاني بيه لأن الطلبة كانوا غلطانين.

وأضاف أنه أخطأ في رد فعله ولم يكن عليه أن يرد على الطلاب داخل الفصل بنفس أسلوبهم، قائلًا: الموضوع كان مستفز جدًا من الطلبة وفيه قلة أدب جامدة في حقي.. وفي حق البنات اللي أنا خرجتهم من الفصل عشان أعرف أرد على الأولاد.

وتابع معلم الفيزياء: مش بنفي إني غلطان لكن الحمد لله أنا بقالي 25 سنة شغال وخرجت أجيال.. والتعليقات تشهد إن سمعتي سبقاني في كل مكان وهسلم أمري لـ ربنا.

كما أوضح أن الواقعة تتلخص في قيام أحد الطلاب بمضايقة نجله في المدرسة وتهديده بالتعدي عليه بالضرب، مضيفًا: طالب مع ابني بيهدده وكل شوية بيقوله هستناك برا المدرسة.. رديت على أهله ومامته جت المدرسة وتلفظت بألفاظ وحشة وفيها إهانة كبيرة.

وأشار معلم الفيزياء إلى أن والدة الطالب تحصلت على مقطع الفيديو ونشرته على مواقع التواصل الاجتماعي من أجل التشهير به، مختتمًا: مش معنى إن فيه خلاف بين ابني وطالب تاني إن والدته تستغل الموقف وتنزل الفيديو عشان تكسرني.. ليه العداوة دي كلها؟