شكرا على متابعتكم خبر عن قتلته وهربت على الشرقية.. ننشر أقوال المتهم الأول بقتل شاب الطالبية في التحقيقات| خاص
الجمعة 10/يناير/2025 – 05:17 ص
ينشر القاهرة 24 الأقوال الكاملة للمتهم الأول بقتل صديقه في منطقة الطالبية بالجيزة، والتي شملت اعترافات مثيرة وتفصيلية.
قتلته وهربت على الشرقية.. ننشر أقوال المتهم الأول بقتل شاب الطالبية في التحقيقات | خاص
واستمعت جهات التحقيق لأقوال المتهم الأول بقتل شاب الطالبية، وقال: اللي حصل إن يوم السبت الموافق 21 ديسمبر 2024، حوالي 3 ونص العصر، أنا كنت شغال في المحل بتاعي، ولقيت محمد علاء المجني عليه واقف قدام المحل بتاعي، وكان ماسك زجاجة خمرة في إيده وبيشرب منها، وأنا لما شوفته طلعت من المحل بتاعي وقولتله يا محمد روح اشرب بعيد عن باب المحل علشان ده محل أكل عيش، وكده مش هيجيلي زباين غير ناس شبهك، راح هو قايلي يعني إيه شبهك دي وزقني وشدينا مع بعض وفضل واقف قدام المحل، وأنا سبته ودخلت أكمل شغلي وبعدها ببص على الباب لقيته مشي من قدام المحل.
وأضاف المتهم الأول بقتل شاب الطالبية في التحقيقات: على الساعة 9 بالليل في نفس اليوم لقيت محمد علاء رجع عند المحل ثاني وكان معاه صاعق في إيده، وكان في الوقت ده سامي أخويا كان بيجيب حاجة من الشارع ولسه راجع، وهو داخل المحل علشان نكمل شغلنا راح محمد علاء كهربه بالصاعق في رجله، راح سامي قاله إنت بتعمل إيه يا محمد احنا مش هنلعب، ومفيش ما بينا تهريج وسابه ودخل المحل وهو زعلان، ومحمد علاء مصمم يهزر معاه وراح كهربه تاني في صدره داخل المحل، راح سامي شتمه وقاله اطلع بره یاض وزقه، راح محمد علاء شتمه.
وواصل المتهم الأول بقتل شاب الطالبية في اعترافاته أمام جهات التحقيق: أنا كنت بكنس المحل ولما سمعته بيشتم سامي وأمي روحت ماسك المقاشة وضربته على دماغه وهو مسك راسه وقالي حلو الكلام ده انت واخوك بقيتوا تعرفوا تتكلموا طيب والله لأوريكوا انتوا الاثنين، وطلع من المحل بتاعنا ووقف قدام المحل بس قصادنا من الناحية الثانية، وبعدها مشي من قدام المحل واختفى حوالي نص ساعة، وفي الوقت ده كان موجود زبون بحلقله لما شاف الموضوع كله طلع مطواه من جيبه وقالي خليها معاك علشان لو محمد علاء رجع اتخانق معاك ثاني.
وأكمل المتهم الأول اعترافاته في التحقيقات: أنا أخدت المطواه منه وحطيتها في جيبي وبعد شوية لقيت محمد علاء رجع تاني وقالي خد يا علاء تعالى علشان أعاتبك في اللي حصل، وأنا قولتله ماشي وطلعت معاه وکنا ماشین مع بعض وقالي: عايز تقل مني في المنطقة وأنا بقوله يعني هو ينفع اللي انت عملته يا علاء اللي انت عملته معايا غلط، يا محمد إنك تكهرب سامي وتشتمنا بأمي، وفي الوقت ده كان في واحد صاحبنا اسمه إسلام سانتوس وأول ما محمد علاء شافه جاي علينا قالي انت عارف إن أنا جايبك هنا علشان أقطلعك وشك وأموتك وراح ضاربني بالبونية في وشي، روحت أنا مطلع المطواة من جيبي وفضلت أهوش فيه ولما قرب عليا ضربته بالمطواه بس مش عارف أنا ضربته فين.
وأردف قاتل صديقه في الطالبية: في ناس كثير جت ولقيت سامي أخويا واقف ومعاه خشبة في إيده وقولتله هاتها وبعدها أخذت سامي ومشينا من نفس الشارع اللي جينا منه، وروحنا أنا وسامي على المحل وبعدها خوفنا لحسن يجي يكسر المحل فقفلنا المحل ومشينا، وبعدها عرفت إن محمد علاء مات روحت واخد بعضي أنا وسامي وطلعنا على البلد بتاعتنا في الشرقية، وتاني يوم أنا كلمت الضابط وسلمت نفسي وبعدها قالي سامي أخوك فين وأنا قولتله سامي معملش حاجة وقالي لازم يجي علشان الكاميرات جابته في الخناقة وأنا أخذت الضابط لحد البيت بتاعنا وطلعت جبت سامي ونزلنا وركبت معاهم العربية وأخدونا على قسم الطالبية وهو ده كل اللي حصل.
واستمعت جهات التحقيق لأقوال المتهم الثاني بقتل شاب الطالبية، وجاءت كالآتي:-
س: ما هي بادرة لقاءك بالمجني عليه؟
ج: لما كنت داخل المحل ولقيت م.ع جاي ومعاه صاعق كهربائي في ايده، وراح م.ع كهربني بالصاعق في رجلي، وأنا قولتله انت بتعمل إيه، احنا مش هنلعب ومفيش بينا تهريج، وراح هو قالي أنا مش بهزر، أنا طلبت معايا أكهربك، روحت سبته ودخلت المحل، وراح م.ع دخل ورايا المحل تاني، وراح كهربني تاني في صدري، وأنا فضلت أزعق فيه، وأخويا كان واقف معايا في المحل، وكان بيكنس، ولما شاف اللي حصل راح ضربه بعصاية المقشة على دماغه، راح م.ع شتمه، ومسك راسه، وقال والله لوريكوا انتوا الاتنين، وطلع من المحل بتاعنا، ووقف قدام المحل بس قصدنا، وبعدها مشي.
س: ما طبيعة الحوار الذي دار فيما بينك وبين المجني عليه حينها؟
ج: لما م.ع كهربني بالصاعق في رجلي، وأنا قولتله انت بتعمل إيه يا محمد احنا مش هنلعب ومفيش ما بينا تهريج، وراح هو قالي أنا مش بهزر أنا طلبت معايا أكهربك، روحت سبته ودخلت المحل وراح م.ع، دخل ورايا المحل تاني وراح كهربني تاني في صدري، وأنا فضلت أزعق فيه، وأخويا كان واقف معايا في المحل وکان بیکنس، ولما شاف اللي حصل راح ضربه بعصاية المقشة على دماغه، راح م.ع شتمه، ومسك راسه، وقال والله لوريكوا انتوا الاتنين وطلع من المحل بتاعنا.
س: ما التصرف الذي ابداء المجني عليه عقب ذلك؟
ج: بعد حوالي ثلث ساعة، رجع ثاني م.ع، وقال لأخويا لو ذكر تعالي معايا لآخر الشارع، وأخويا طلع من المحل ودخل معاه لآخر الشارع.
س: ما التصرفات التي بدرت منك قبل المجني عليه آنذاك ؟
ج: أنا فضلت واقف قدام المحل.
س: ما الذي حدث عقب ذلك ؟
ج: لقيت إ.س بيجري ناحيتهم لآخر الشارع، روحت جريت عليهم وكنت ماسك في إيدي عصايا خشب، ولما لقيته ماسك في أخويا روحت ضربته بالعصايا على كتفه مرة واحدة، وبعدها سمعته بيقول أنا اتغزيت، أنا اتغزيت، روحت واخد بعضي، أنا وأخويا ومشينا.
س: ما طبيعة ذلك الاشتباك تحديدًا؟
ج: أنا لقيت م.ع، ماسك في أخويا، روحت ضربته بالعصايا على كتفه مرة واحدة، وبعدها سمعته بيقول أنا اتغزيت، أنا اتغزيت، روحت واخد بعضي أنا وأخويا ومشينا.
س: من كان متواجدا آنذاك ؟
ج: ناس كتير وتحديدًا كان إ.س، وم.ِش، شافوا الخناقة.
س: وهل أبصرت شقيقك المتهم ع.أ حال قيامه بتسديد طعنة للمجني عليه سالف الذكر آنذاك؟
ج: لا، أنا مشوفتش الكلام ده، أنا لما وصلت كانوا ماسكين في بعض، روحت ضربته بالعصايا على كتفه مرة واحدة، وبعدها سمعته بيقول أنا اتغزيت، أنا اتغزيت، ومكنتش أعرف مين اللي ضربه، روحت واخد بعضي أنا وأخويا ومشينا.
