نقل الفنان محمود البنا للمستشفى بعد تعرضه لوعكة صحية شديدة

السبت 30/نوفمبر/2024 – 07:16 م

كشف الدكتور أشرف زكي، نقيب المهن التمثيلية، عن تعرض الفنان محمود البنا لـ وعكة صحية شديدة، نُقل على إثرها إلى أحد المستشفيات حتى تماثله للشفاء.

وقال أشرف زكي، في تصريح خاص لـ القاهرة 24: محمود البنا في مستشفى الشبراويشي اللي في الدقي، بيمر بأزمة صحية والتنقل لما تدهورت حالته والنقابة بتابع معاه.

سبب غياب محمود البنا عن الساحة الفنية 

وعلى جانب آخر، سبق وكشف الفنان محمود البنا، أسباب غيابه عن مجال التمثيل خلال السنوات الماضية، حيث قال في تصريحات خاصة لـ القاهرة 24، إنه ابتعد عن المجال الفني منذ 6 سنوات، بسبب التغييرات التي حدثت في الوسط الفني حاليًا، مردفا: أنا مختفي بسبب الوسط والمناخ والأعمال والورق.. حاجات كثير اختلفت عن الفترة اللي فاتت.  

وتابع محمود البنا: الجمهور نظرتهم للفن اتغيرت.. زمان كان في ثقل وعمق، دلوقتي كله بيبص على اللبس والأسلوب، ولكن نفسي نعمل ميكس ما بين الماضي والحاضر، ويبقى في إيديولوجية نقدم بيها مصر، لما تيجي تعمل مسلسل لازم تبص على مصر من وجهة نظر العقاد وطه حسين ونجيب محفوظ، ويكون عندنا غيرة على مصر علشان نعمل فيلم عظيم، ولكن لا يوجد أحدًا يعمل بذلك المنظور.. للأسف البعض بيبقى عايز يقبض وخلاص، والأعمال دلوقتي بقت زي التورتة.. كل واحد ياخد حتة وخلاص.